Gran partezipazion y devertimënt a “Trix days”
N fin dl’ena de juesc da mëisa y de juesc tl scur
Cun gran suzes iel ntan l ultim fin dl’ena unì a s’l dé la manifestazion “Trix days” a Urtijëi. Chëst ann iel bele l cuarto ann che la grupa Trix – VKE Gherdëina mët a jì n fin dl’ena de devertimënt per pitli y granc tla aula magna dla scola elementera de Urtijëi. L fin de chësta ancuntedes ie de ti dé l’ucajion a families y a grupes de cumpanies de sté deberieda te na bela armunia y bona ueia fajan n blòt juech da mëisa. Juesc da mëisa n iel de uni sort y à n gran valor per l crëscer adum te familia, per l svilup di mëndri, ma nce per l svilup dla persunalità di jëuni.
Cun na bela lingia de passa 250 juesc pudans nsci pité n valguna ëures de l’aurela curta per uni età tres juesc che cuntën nce aspec pedagogics. Chisc renforza danter l’auter la capazità de se cunzentré y de meter averda, dl rujené, de se ujiné y de tenì adum y, nia da desmincé, l devertimënt ne mancia.
Juesc tl scur
Coche uni ann fovel nce chëst iede n self a tema, ulache l vën for anjenià ca n ambient y na atmosfera particulera per pité lerch a cër’ juesc. Chëst ann se ons pensà de nscuré n self a na cërta maniera da pudëi fé juesc tl scur y pudëi nsci purvé ora l juech da n auter pont de ududa, da chël de n vierc. Deberieda a Heidi Perathoner iesen stac boni de urganisé na ancunteda cun n vierc de Gherdëina y cun doi vierces dl zënter per vierces de Bulsan, che acumpaniova nsci i jugadëures tl self scur.
Speron de avëi dat la puscibltà a truep mëndri, families y jëuni de passé n bel fin dl ena n cumpania y davia che la festes da Nadel ie dan porta y vel un se ëssa povester mpensà de duné vel juech, pitons ai 25 de nuvëmber na sëira de nfurmazion ulache l unirà spiegà n valgun juesc y ulache n puderà nce nstës i purvé ora, a na maniera da se fé na idea sun ciun juech che fossa l plu adatà!
Cumentares
Scrite it al feed RSS de chesc Articul.