No current events.
Trix Days 2011
|
TRIX DAYS ai 19-20 de nuvëmber! Autonn, la sajon di juesc da mëisa: Dedora freit, dedite mpue dastufé, cie iel pa de miec de n valgun juesc da mëisa cun cumpanies o cun duta la familia? La lia TRIX – Juesc da mëisa nvieia chëst ann inò a i TRIX-Days, l fin dl ena ulache families, mutons, jëuni y manco jëuni possa sté adum fajan n valgun juesc da mëisa n cumpania. N puderà cri ora danter n surtimënt de passa 350 juesc da mëisa de uni sort: juesc per i plu pitli, per families, de strategia y monce per senioren. Seurapro saral da pudei purvé ora i nuef juesc da mëisa ora dla LEGA y i nuef „Spiele des Jahres“. Chëst ann saral na sala cun l tema „Future“ y n turnoi ulache i mutons puderà mustré si abilità y vëncer de biei juesc. I TRIX-Days 2011 sarà n sada ai 19 de nuvëmber dala 14.30 ala 19.00 y n dumënia, ai 20 de nuvëmber dala 10:00 ala 17:00. Cun vosc uni se ncunforta la lia TRIX. |
 |
Lego Heroica
N sada ai 5 de Nuvember, uniral prejenta ntan l domesdi de Trix i nuef juesc dla lego dla serie Heroica.
Coche for a l Lego abu na boniscima idea, de fe n juech de "ruolo" semplifica per mutons. L dut fat cui toc de lego che ti da samben mo zech de plu.
Ve aspiton duc, mutons y mutans cun families dala 14:00 te calonia de urtijei a purve chisc nuef juesc.
Quiz a pesć Juech dl Ann 2011
Sciche uni ann iel da vencer un di juesc dl ann. A desferenzia dl ann passà iel chëst ann 3 categories de juesc. Nchin a śën cunescioven l "Spiel des Jahres", l "Kinderspiel des Jahres" y da chëst ann iel nce n "Kennerspiel des Jahres". Chësta categoria se urientea dantaldut a juesc per chëi jugadëures che à bele fat truepa esperienzes cun juesc da mëisa y che chier nsci nce plu na sfida tl juech.. Per pudëi ve nfurmé sun i Juesc dl Ann che ie sun la lista da lité pudeis cliché TLO.
Per de ju vosta votazion pudeis druche TLO
Autra informazions sun l regulament.
Uniun a la puscibilità de mande it na proposta, sce abineron plu minonghes cun l medemo inuem tuleron l'ultima che on giapa, nscila eis la puscibilitá de mudé minonga. N puderà mande it la votazions fin al 26.06 davia che ai 27.06 ven premiei l Spiel des Jahres y l Kennerspiel des Jahres. Canche ai 25.07 unirà ora nce l Kinderspiel des Jahres scrijeron tlo sun trix.cc chiche a venciù. Sce l sarà deplu che a ndevinà dui 3 juesc unirà tra la busca per chiche venc.
Juesc dl ann 2011
Dan valgun dis ie ruveda ora la lista nueva di juesc numinei per l pest "Spiel des Jahres 2011". Da chëst ann ai metu leprò na terza categoria che se tlama "Kennerspiel des Jahres" che dessa premië n juech adatà a jugadëures esperc. Per udëi la lista di juesc numinei pudëis cialé TLO. Ntan nosta proscima manifestazions puderëis sambën coche for unì a purvé ora i juesc!
Di mundiel dl juech 2011
Per la fin dl an de scola na manifestazion mpue speziela: Per l di mundiel dl juech 2011 met la grupa TRIX a ji ai 4 de juni n domesdi, ulache n possa purvé ora de uni sort de juesc che ven da dut mond. Unide a purvé juesc dal Japon, dal Indonesia, dal Vietnam, dal Kenia,... y ngrum da ngrum de autri posc. La Butëiga dl Mond dajerà nce ora velch da bever y da maië.
Sun vosc uni se ncunforta la grupa TRIX y la Butëiga dl mond-Gherdëina.
Na bela cumpëida de jënt ai TRIX-Days 2010
Inò n gran suzes per la cuinta edizion di „TRIX-Days“ tla Aula Magna dla scola elementera de Urtijëi: doi dis ntensifs de juesc da mëisa.
La lia Trix - Juesc da mëisa à sciche bele da tradizion inò metù a jì i Trix-Days, n fin dl ena per families, jëuni y manco jëuni dedicà ai juësc da mëisa. Belau 400 persones à ai 13 y 14 de nuvëmber nuzà l‘ ucajion de unì cun familia y cumpanies a fé n valgun juesc da mëisa n cumpania. Chësc desmostra che l gran lëur che n à abù a anjenië ca se a inò n iede paià. Chëst ann iel coche for unida fata na sala a tema: L se tratova de na sala tl stil dl medieve. Autra atrazions fova l turnoi cun l juech „Auf die Schätze, fertig los“, i juesc de LEGO, l Cuboro, l Geomag y sambën n surtimënt de passa 300 juesc da mëisa. Per n grum de jënt fovel na marueia udëi dan de sortes de juesc che l ie: per mëndri, per jëuni per families, de strategia, da rì, da pensé, da fé da totl, da se muever, da tré i dadi, de Lego, de lën, de plastica, da fé tl scur, interatifs, ...
N gran rengraziamënt va a duc chëi che a juda ntëur ite: cumpanies, i jëuni y jëunes dl JAWA y la lomes che a fat de bona tëurtes, coche nce la lia dl scioch y i sustenidëures a livel finanziel. Zënza duc ëi ne fossel nia stat mesun meter a jì na manifestazion de chësta mesura. De gra nce a duc chëi che se a tëut dlaurela de unì, sustenian nsci la Lia TRIX per jì inant cun mo na majera motivazion.
Trix Days 2010
|
La ie inò tan inant! La grupa TRIX mët chëst ann inò a jì i TRIX-Days, l fin dl ena ulache families, mëndri, jëuni y manco jëuni possa unì y sté adum, fajan n valgun juesc da mëisa n cumpania. N puderà crì ora danter n gran surtimënt de passa 300juesc da mëisa de uni sort, cun leprò nce i ultim juesc unic ora chëst ann! La sala a tema sarà chest iede sun l Medieve, ulache ve aspieta n ambient che ve purterà zeruch tl tëmp di ciavalieres y di ciastiei... L unirà nce metù a ji n turnoi per mëndri, ulache n possa vëncer de biei juesc! I TRIX-Days 2010 sarà n sada ai 13 de nuvëmber dala 14.30 ala 20.00 y n dumënia, ai 14 de nuvëmber dala 10:00 ala 17:00 tla Aula Magna dla scola elementera de Urtijëi. |
 |
Mo n iede juesc dla Lego a Trix!
Juech dl Ann per MUTONS 2010!
Dantier ie unì cunedì l "Juech dl Ann per Mutons 2010":
DIEGO DRACHENZAHN
Śën cunescions i doi juesc dl ann... ma purtruep ne à DEGUN di partezipanc crì ora chisc doi juesc! Perchël uniral n ucajion dl proscimo TRIX trat ala busca danter i candidac che à ndevinà un n juech...
Se ncunferton sun vosc unì n sada, ai 28 de agost!
Juech dl Ann 2010!
Dantier, pra l ultimo Trix, fovel la puscibilità de fé pea l quiz sun ciun juech che ëssa da deventé "Juech dl Ann" y "Juech dl Ann per mutons" 2010. 17 jugadëures à fat pea y dat ju si preferënza:
Śën savos bele ciun juech che ie deventà "Juech dl Ann" 2010, ma per l juech per mutons messons mo aspité nfin ai 2 de agost! Permò iló savrons da dì chiche à venciù l quiz - sce l sarà pa un che vënc, ajache mé doi partezipanc à lità "Dixit"!
Juesc da meisa te internet
Ve iepa mei suzedu de ulei fe n juech da meisa ma ne abineis deguni che a dlaurela o ueia?
Po pudeis ciale it sota Brettspielewelt !
Tlo pudeis fe ngrum de juesc, tei che cunesceis bel o enghe npare de nueves.
Bon devertiment :)
Seniores y juesc da mëisa?
Chësc à desmustrà ai 7 de auril la grupa seniores de Sëlva, che à nvià - sciche bele autri iedesc - la grupa TRIX per mëter a jì na ancunteda fajan juesc da mëisa per seniores.
Cun chësta atività se à la grupa TRIX dl VKE - sezion Gherdëina - nsci giaurì a duta la fasces de età. Y n muessa dì cun gran suzes:
L fova na sudesfazion a udëi che l ti savova bel a mparé juesc nueves nce ala jënt de tëmp.
Sambën che l costa n pitl sforz a se lascé ite sun velch de nuef. Ma da l’autra pert juden nsci pea a mantenì ativa la mënt. Y pona ons udù che i effec colaterai de n blot juech ie plu che positives nce pra i seniores: Nsciuma duc à abu na drëta “hez”.
Ciuni ie pa juesc adatei per seniores?
La carateristighes plu mpurtantes ie: Pedines grandes y saurides da tenì. La brea dl juech da mëisa dëssa avëi scritures grandes assé y dëssa vester tlera. La regules dëssa vester saurides da capì, ma nia banales. Y dantaldut: L juech dëssa crië comunicazion danter i jugadëures.
For plu i plu, vën metui sun l marcià juesc da mëisa per seniores. Nsci per ejëmpl la firma SELECTA cun la serie “Selecta nobile” o nce la firma “Ravensburger” cun la serie "Spiel und Vergnügen". Ma nce de autri.
Sëisa devëntei mpue dal bunder?
Pona pudëis sambën unì pra la proscima ancunteda per seniores te Sëlva, ai 16 de juni dala 14.00. Ve aspiton!
Turnoi de LEGO
Na gran cumpëida de mutons se à ancuntà a fé juesc dla LEGO
N sada, ai 27 de merz ie unit prejentei 10 juesc fac dldut de toc de LEGO. Ben 30 mutons y genitoresc a nuzà chësta ucajion unian coche uni ultima sada dl mens dala 14.00-17.00 te calonia bas ite de Urtijëi a jughé. Danter i partezipanc iel unì cris ora trëi pesć.
La proscima ancunteda dla grupa Trix ie ai 18 de auril te Cësa de Cultura a Urtijëi pra la „Festa dla cultures“ metuda a ji dala Buteiga dl Mond de Urtijëi. N chësta ucajion saral da udëi y purvé ora juesc de dut l mond, duc ie de cuer nviei!
Ueia de fé LEGO mpue autramënter?
Proscima sada, ai 27 de merz 2010 metons a jì na n turnoi de LEGO… Eh, ëis propi liet drët: l se trata de 10 juesc da mëisa fac de LEGO. Duc i sculeies dla scolina, dla scola elementera y dla scola mesana ie de cuer nviei. Danter i partezipanc uniral trat ora trëi juesc dla LEGO. Unide duc!!! Se ancunton n sada dala 14.00 ala 17.00 te calonia de Urtijëi bas ite.
Dasseira tl Saut uniral ence fat n turnoi per i granc, ma chesc cun juesc fac aposta per 2 persones. Tlo nen dal de uni sort y per uni gusto.
Deplu sota
Truep jëuni tl Saut l' ultima sada de fauré
L ie propi inò stat na blota sëira! Passa 25 jëuni se à inò ancuntà tl Saut a fé vel juech n cumpania.
"Siedler von Catan", "Celtica", "Fauna" y "Die Tore der Welt" ie mé valguni di juesc che ie unì jughei. Danter chisc a plajù dassënn i ultimi 2.
Fauna ie n juech de savëi y de ndeviné che trata di tieres de dut l mont. N mussa purvé a ndeviné de n grumon de tieres defrënc l pëis, la grandëza, la lunghëza dla coda y i posc' ulache i viv. Chiche sà o ndevina plu avisa vënc.
Die Tore der Welt ie n juech de strategia trat dal liber cun l medemo inuem scrit da Ken Follett. Chësc ie bele l segondo juech che ie unì crià sun la storia de un de si libri y chësc ie ënghe scialdi garatà. La se trata de cuntribuì a fé su costruzions sciche n mulin, n spedel o n puent te n luech dl Ingltiera ntëur al 1800.
